It-trofew ta’ dawn il-kampjonati bl-isem ta’ Henry Delaunay, fil-bidu ta’ Mejju beda vjaġġ madwar il-bliet li fihom se jkun qed isir il-logħob. Delaunay kien amministratur Franċiż tal-Futbol li wara li lagħab mat-tim ta’ Pariġi bl-isem ta’ Etoile des Deux Lacs, sar referee. Hu rtira wara inċident li kellu waqt logħba meta kien bela s-suffara u kisser żewġ sinniet wara li ntlaqat direttament f’wiċċu bil-ballun.
Beda l-karriera ta’ amministratur fl-1906 meta sar President ta’ Etoile des Deux Lacs u mbagħad Segretarju Ġenerali tal-Comite Francais Interfederal minn fejn oriġinat il-Federazzjoni tal-Futbol Franċiż fl-1919 u li tagħha baqa’ Segretarju. Kien hu li fil-1927 ippropona li jibdew isiru l-Kampjonati Ewropej tan-Nazzjonijiet u għalhekk it-trofew issemmiet għalih.
